What even minimalism means معنى التجرد

من وقت قريب لاحظت ان خزانة ملابسي بحاجة أنها تترتب وما اقصد هنا الترتيب المعتاد  لا الجرد أو التصفية وهذا الشيء نادراً ما نسويه مو بس مع خزانة ملابسنا لا مع كل أشيائنا اللي بنراكمها عندنا يوم بعد يوم وما نعرف كيف نتعامل معاها و الصراحه ذا اسوء شيء على الإطلاق !

كثيرة التساؤلات اللي ولدت بمجرد مشاهدتي للفيلم الوثائقي minimalism اللي بيعني التجرد من كثرة الأشياء حولك اللي بشكل وبآخر بنقوم بتجميعها و بالغالب ما نكون حتى متأكدين من إذا بتضيف لنا أو لا وما إذا بنكون راغبين فيها أصلاً, و ما هي تلك الدوافع التي تجعلنا منقادين دائماً للاستهلاك؟ وليه عملية الانفاق بحد ذاتها بتشكل بالنسبة لنا مصدر سعادة؟

هذي التساؤلات اللي خطرت ببالي بعد ماشفت الوثائقي وما أخفكيم اني إلى الآن بفكر فيها وبتدور بذهني محاولة مني للتغيير اللي وإن صار يكون على المد البعيد مومجرد تغيير مؤقت أكون فيه مدفوعة تحت تأثير معين يخليني اتصرف على نحو غير منطقي. أنا أكيدة أن العمل هذا أثر بشكل وبآخر وحيكون البوابة أو خلوني أقول راح يشكل النقطة الفارقة في حياتي بحيث أني بحرص على أني أكون مستهلكة لكن الفرق أني بستهلك بوعي وهنا الهدف اللي بسعى له , لاحظت اننا بكل فرصة بتحصل بننفق كثير على أشياء تافهة جداً من منطلق "الرخص" بغض النظر انها تافهة ما نحتاجها بالضرورة لكن الحقيقة المرة هي أن استهلاكنا بشكل كبير بيكون سببه ما يسمى بالإعلانات واللي مو بس صارت بتكون مثل زمان بتدار من قبل التلفزيون لا الموضوع توسع بشكل أكبر من كذا وصار بيدار على نطاق أكبر وبعضها بتكون إعلانات مع الأسف مسمومة لأنها بتضر بسبب توجيهها للأطفال وكلنا بنعرف انو الأطفال قد ايش هم فريسة سهلة وفي الواقع هم أيضاً أكثر انقياداً منا وبيلفتهم أي شيء وكل شيء .

.
.
.

لذلك اعتبر الوثائقي هذا من أكثر الوثاثقيات تأثيراً اللي شفته إلى الآن ولأسباب عديدة الصراحه أولها مثل ما سبق وذكرت بيدفعك نحو التغيير ويخليك تراجع معتقداتك اللي ظليت ولفترة طويلة بتؤمن فيها وبتتمسك فيها ومن يدري يمكن وصل بك الحال أنك بتعتز فيها , والشيء الأهم بيخليك تفكروتبطل إنقياد وبيخليك تكون شخص واعي , بالإضافة أنك راح تضع حد لكل شيء من شأنه بيعمل على استغلالك في لحظة اللاوعي منك .